Le blason de la main de Claude Chappuys, 1500-1575

par Guy Rancourt le Ven 11 Juin - 19:40

LE BLASON DE LA MAIN

O doulce Main, Main belle. Main pollie,
Main qui les cueurs fait lier et deslie,
Main qui le mien a prins sans y toucher,
Main qui embrasse, et semond d'approcher,
Main qui à moy doibt ouvrir, ô Main forte,
Qui fors à moy, à tous ferme la porte.
Main qui souvent en estraignant le doigt
Sans dire mot m'a dict je sçay bien quoy.
Main qui la trousse et fleische, sans doubter,
A Cupido seule pourrois oster :
Dy je la main que Cupido feroit
Mouvoir d'amour quand il la toucheroit.
Main qui peult seule et le soir et matin
Laisser la mienne approcher du tétin.
Main qui permet s'il est besoing qu'on puisse
En se jouant sçavoir quelle est la cuisse :
Main qui permet par foys oultre passer,
Mais ce seroit assez pour trespasser.
Main qui peult bien faire encore autre chose,
Qui plaist autant, mais que dire je n'ose.
Main à qui seulle appartient qu'elle sçache
Ce qu'on ne voit, ce qu'on cherche, et qu'on cache :
Main qui peult mieulx par escript asseurer
Que l'œil pour voir, et bouche pour jurer.
O digne main qui jusque au ciel approche,
Main qui fait honte à la neige et reproche,
Main qui esteinct le neu de fermeté,
Main qui chatouille en toute honnesteté,
Main que Venus veult pour sienne advouer,
Main qui du lut doulcement sçais jouer,
Main quant Orpheus mesmes l’escouteroit,
Comme vaincu la harpe laisseroit,
Main que Pallas choisiroit pour escrire,
Main qui autant que la bouche peulx dire.
Main qui trop plus d’heur envoye en absence,
Que l’œil n’en peult octroyer en presence.
Main fretillante, ostez voz gans, ostez,
Et vos plaisirs par voz doigts me comprez
J’entends ceux-là dont faut que soys tesmoing
Et quant de toy, helas! Je serois loing,
Main je te prie, fais responce à la mienne,
Main r’escry moy, que soubdain je revienne.

(Claude Chappuys, 1500-1575)