Contreblason du coeur de Charles de La Hueterie

par Guy Rancourt le Ven 24 Avr - 17:29

Contreblason du coeur

Le cueur assis devers le costé gauche,
Me fera-il icy quelque reproche ?
Il est nommé gentil et noble cueur,
Des passions car il est le vainqueur :
Si l'on requiert que sont les passions,
Adversitez sont et tentations,
Soit de la chair qui se nomme tant belle,
Là où convient le cueur estre rebelle,
Et ne souffrir le plaisir de ses yeux
Qui sur la chair sont toujours ennuyeux:
Les passions, autres sont de fortune,
Ou d'accident, par tristesse importune,
Où le cueur est si fort et valleureux,
Que pour ce mal ne se tient douloureux :
Et quand il vient à plus haute richesse,
Plus s'humilie, où on voit sa noblesse.
Le cueur doit estre allié avec l'ame,
Le cueur ne veut que vertu pour sa dame,
Le cueur est roche de toute adversité,
Le cueur contraire est à meschanceté;
Le cueur ne veut penser chose vilaine,
Le cueur demande au Sainct Esprit alaine :
Si tout le corps souffroit peine et dommage,
Dieu ne requiert que le cueur pour partage.
Le cueur assis est au milieu du corps,
Et de la chair endure les discordz.
Le cueur est maistre et seigneur de la bouche
Ne vueillant cas qui meschanceté touche.
Corps, pauvre corps, ce n'est pas le cœur là
Que ton blason des membres appella
Le cueur mignon, le cueur joly qui ayme
A plaisanter ; cueur qui controuve et seme,
Et parler fait motz courtois, gracieux,
Ainsi que font ces plaisans amoureux
Pour décevoir leur dame, et au contraire
Le cueur de femme aux hommes adversaire,
Pensant tousjours quelque mal ou finesse
Pour destourner l'homme de sa sagesse;
Et quand le cueur en la femme est subtil,
Il est tout seur qu'elle a très-bon babil.
Le cueur de soy est de chair une masse,
Tout à l'entour petite peau le lasse,
Et si elle est percée ou corrompue,
De tout le corps la substance est rompue.
Le cueur est cher amy d'elle et bien proche,
Et par la chair souvent il se desbauche,
Estant de luy enclin à ses desirs,
Quant il ne veut s'adonner aux plaisirs
De toy le corps, et qu'il ayme raison,
Lors tient la chair un venin et poison :
Après la mort le cueur en sera cause,
Que toy le corps avec l'ame repose.
Mais si tousjours la chair il a servy,
Chascun sera par male mort ravy.
Le cueur encor après la mort du corps
Est aussi bien appelé cueur alors,
Comme devant ne changeant point son nom,
Et ne pourroit avoir autre surnom.
Ce n'est pas luy qui au corps commandoit,
Cueur c’est organe où l'esprit se rendoit,
Par luy donnant sa volunté entendre,
Quand il vouloit quelque chose entreprendre.

(Charles de La Hueterie, Protologies Françaises, 1536)

par Guy Rancourt le Ven 24 Avr - 17:30

Note sur l’auteur

On ignore presque tout sur cet auteur, sa date de naissance et de décès, sauf son inimité d’avec Clément Marot et la publication d’un recueil de poèmes, sans lieu : « Protologies Françaises » en 1536 où l’on peut lire ses « Contreblasons ».

par **Marie** le Sam 25 Avr - 22:35

Merci Guy de nous présenter cet auteur

Partager tes découvertes est un plaisir

Marie

Contreblason du coeur de Charles de La Hueterie

Contreblason du coeur de Charles de La Hueterie

Re: Contreblason du coeur de Charles de La Hueterie

Re: Contreblason du coeur de Charles de La Hueterie